ایک نیوز:وزیراعظم محمد شہباز شریف سے امیر جماعت اسلامی حافظ نعیم الرحمان کا ٹیلی فونک رابطہ، بجلی کی قیمتوں میں کمی پر وزیرِ اعظم کا شکریہ ادا کیا۔
تفصیلات کے مطابق دوران گفتگو امیر جماعت اسلامی حافظ نعیم الرحمان نے وزیراعظم محمد شہباز شریف کا بجلی کی قیمت میں کمی کرنے پر شکریہ اداکیا۔
وزیرِ اعظم نے خیرمقدم کرتے ہوئے کہا کہ مشکلات کے باوجود عوامی ریلیف کو اولین ترجیح دی اور یہ مشن جاری رکھیں گے ،انشاء اللہ پاکستان کی ترقی کا سفر جاری رہے گا۔
دونوں رہنماؤں نے غزہ میں نہتے فلسطینیوں پر اسرائیل کی بلا اشتعال بمباری اور ظلم و ستم پر بین الاقوامی قوتوں کی خاموشی پر تشویش کا اظہار کیا ، غزہ کے نہتے فلسطینیوں پر جاری صہیونی ظلم و جبر کے خلاف ہر بین الاقوامی فورم پر آواز اٹھانے اور پاکستان کی حمایت جاری رکھنے کے عزم کا اعادہ بھی کیا۔
وزیرِ اعظم نے کہا کہ صہیونی ظلم و جبر کے شکار نہتے فلسطینی بہن بھائیوں کی حمایت کے حوالے سے پاکستان کا مؤقف واضح ہے۔
